Cinespot 動映地帶 : 童夢奇緣

童夢奇緣
Wait till you're Older

評分: 10/10
年份: 2005
片種: 溫情
導演: 陳德森
演員: 劉德華、黃日華、莫文蔚、林家棟、應采兒、杜汶澤、田蕊妮、李冰冰、馮小剛、薜立賢

劇本, 對白, 都是水準之作. 編劇很聰明地安排超現實的劇本生活化.光仔父對光仔用錢捕獲的寵愛, 成為佢"變成大人"後可以生活的"基金". 光仔對母親的綣戀associated with 女人的三個耳孔,亦冇需額外地交代光仔對靚女miss 的愛慕,及順理成章地交代到大個光仔同靚女miss 共渡一夜的個段關係 (成熟身體仍是小孩思想情感)畫面調色, 角度, 氣氛, 音樂, 美術,都係我好鐘意的以前UFO個種感覺,好生活化之餘又好浪漫有d 超現實. 可以好香港味, 但又拍得有d 超現實(除左某幾個鏡頭, 成個故事就係一個小城市入面發生,可以係香港亦可以係任何氣氛) 主觀上俾滿分 (尤其鐘意開頭動晝,神秘人周遊各國及大樹)

導演處理手法, 平實細緻, 好自然好舒服, 調子節奏處理得好平衡好好.但最要讚的, 都係一套戲裏面的最重要的演員. 由配角客串到主角,由男角到女角, 由童星到明星, 每一個都做得十分出色.選角選得十分好, 每個角色都搵到有個種氣質的演員.

神秘人 - 馮小剛
搵到呢個導演客串呢個角色,好有味道,正宗內地演員的功架,好應該係劉華天地無賊同佢的交情(最攪野係神秘人個落腳處, 其中一個鏡頭見到一幅布寫住天下無賊,令我呢個天下無賊+馮小剛+劉華+劉若英die hard fans 會心微笑). 佢亦帶出了戲中最重要的幾句對白."人生最慘的係冇得重來,人生最好的亦係冇需要重來"

周副校長 - 林家楝
原來, 近年每一套劉華戲中必有的一個演員(係一個人話俾我聽, 大家可以留意下),就係林家楝. 雖然每套戲的角色都唔搶,但睇得出佢好俾心機. 驚喜不大,但依然有水準."有時唔係我地肯唔肯面對現實, 係人地有冇俾機會"

大雄, 大雄爸爸, 大雄媽媽
大雄爸媽,出場只有一場戲,(大雄媽媽甚至只係在係screen到出現)郤是我留下最深刻的印象的演員.他們, 根本不是在演戲,是短短幾個鏡頭演活角色. 光仔問大雄爸爸,大雄媽後生過你咁多, 她真的愛你嗎? 呢種愛,係香港進步的都市我找不到,郤真實地存在係好多較落後,較樸實的地方. 進步的都市,大家都努力地找尋,選擇,最好的野, "最好的愛",有幾多人找到?(周副校,光仔老豆等)簡簡單單,冇得選擇,全心全意,反而可以隨手可得. 好鐘意跳舞呢個位爸:"阿大雄媽咪啊, 老師問妳係咪真係愛我喎?"媽:"aiya.. 邊有先生做家訪問人呢d 咁的問題架"大雄,相對冇佢爸媽咁超級入戲,但表現亦好.(雖然勸人出廁所個個位太過刻意同略為老土, 淨左少少農村人個種樸實簡單直接)

應采兒
好靚的一個女仔, 演技磨鍊進步中. 起碼,佢吸引了觀察的視線,撩起一般男生對靚女miss 的憧憬,亦立體了為人師表, 都只不過係一個人, 一個後生女, 一個在愛情中跌盪的時下女仔."我仲後生, 仲可以有好多時間等"

警察705 and his partner - 阿杜阿杜老婆擺明客串攪笑, 亦恰當地, 冇過火地帶出笑位, 稱職

光仔繼毋 (其實呢個情況係咪叫繼母? ) - 莫文慰
佢的忍耐, 佢的克制, 一直都受唔到人明白欣賞. 但佢仍然堅守著自己係屋企的角色. 外表堅強, 但亦有不想再忍耐的時候.大家心裏面都有一個包袱, 等大家都死忍, 唔講出黎, 一張相, 郤令嫉忌的女人爆發出黎, 再不能大方. 莫演得很出色 "等光仔返黎後送佢去寄宿學校""原來, 我一直冇原諒過你"

光仔老豆 - 黃日華
因為自己, 令到佢身邊的2個女人, 細佬都活得唔開心. 內疚得黎又糯弱, 逃避, 想補求得黎又被動. 但最後面對老過自己的光仔, 一巴車埋去, 係我成套戲最感動的位, 佢終於最後做番一個老豆應該做的野, 可以理直氣壯地話俾自己個仔乜野係岩乜野係錯.演得出一個中年男子對問題的逃避,對處理外遇,家中,工作,教細佬的問題,都顯得冇能為力.但,糯弱的心始終係深愛保護自己的屋企人.光仔:"你係因為內疚, 先一直對我咁好"光仔老豆:"我一直都對你咁好, 因為我錫你"

童年光仔
頑皮,惡作劇, 好勝,對媽的懷念而引發的極端思想,主觀地憎恨繼毋.對靚女miss 的幻想,憧憬,對細佬的調皮眼神動作,都幾正

光仔細佬
超極度討好的小演員,可愛得不得了.比戲份更多的哥哥更搶. 一時傻頭傻腦, 善良, 富同理心. 認得出哥哥的驚喜眼神, 同最後個幕的叻字手勢,開心的表情,碌大眼望老豆講肉麻骨痺野的神情,實在令觀眾愛他愛得不得了.

光仔 - 劉華
劉華die hard fans 的我, 實在愛他欣賞他到了極點. 怎可以將靚仔有型好戲有內涵有思想有message勤力肯付出, 所有野都放係一個人身上,但郤不覺得浮誇? 最後幾幕,與黃日華的對手戲, 實在令身為男性觀眾的我湧現男子情仇, 男與男, 父與子之間獨有的感情關係的深刻的感覺, 動人, 細膩, 真實, 不溶於言語間的情感湧現,並不浮誇地躍動了我的眼淚. "我知錯了, 我唔理, 你幫我攪番掂""光仔老豆, 食少幾枝煙啦"

光仔生母 - ?
本片最靚的女角, 並唔係應采兒, 而係光仔生母. 一直只係舊片段同相中出現的女子, 是我覺得很漂亮很漂亮的一個女子, 不能忘懷. 佢係邊個演員? (我睇唔清楚, 李冰冰?)

總觀係今年我最欣賞, 最真心讚嘆, 最愛的一套電影. 細路變大人呢個橋段出現過唔少次(港片西片), 但我覺得今次係處理得我最喜愛 , 最深刻, 最感人, 最地道的一套. 開頭開得有d 好似大魚的感覺. 港片, 如果可以好似呢套咁咁用心, 己經勝過無數荷里活大片

猛人 - 劉德華,黃日華,莫文慰,陳德森,眾大細演員, 台前幕後的細心, 編劇的對白

文: Ng Ka Ka

Share |