b.wing X 百老匯院線禮儀片踏入第15年

撰文： 編輯部 | 發布日期： 2025年08月21日

為慶祝 b.wing 與百老匯院線攜手合作15年，今個暑假推出全新「電影院禮儀」短片，以煥然一新的面貌，更邀來兩位神秘星級朋友加盟「A仔 Live Band」，為觀眾帶來前所未有的觀影禮儀體驗！全新禮儀短片將於今日起於香港全線13間百老匯戲院、77個放映廳放映。

百老匯院線一直致力推動創新，2011年將 b.wing 的標誌性角色A仔首次帶到大銀幕。邁向第15年，創作團隊再次攜手，以趣味、教育與驚喜融為一體，呈獻全新短片。

b.wing創作人分享重新製作禮儀短片的原因：「今年係 A仔走入戲院大銀幕 15 週年，我想為佢留下一個紀念。戲院在後疫情時代生存，日常生活開始了另外一種模式。我們希望藉住呢條短片，提醒大家珍惜入戲院嘅那一刻——一齊熄手機，好好坐定，等戲院燈慢慢暗下來，係一種值得被保留嘅「儀式感」。入戲之前，就由呢個簡單但重要嘅動作開始。」

新片加入更多A仔朋友，更多了一個黑影角色，b.wing分享她的創作意念: 「其實今次多咗 Shadow、Catman、5號同 7號呢四個角色。就好似拍戲咁，每個時代都會有新演員出現，前人帶後人，角色之間有延續，亦有傳承。我想透過佢哋，講一種「一代接一代，一齊入戲」嘅感覺——戲唔係一個人演，觀眾都唔係一個人睇，大家喺戲院裏面，一齊構成咗一個完整嘅畫面。」

至於黑影角色的設計，b.wing 解釋：「佢其實係 A仔嘅影子。一直我們了解到的電影就是光與影共存——冇光就冇影，冇影亦唔會顯出光。我想透過『黑影』呢個角色，講一種內在嘅覺察：黑影係 A仔內心嘅倒影，就正如 A仔你我嘅內在朋友。當我們身處在黑暗下來，不妨幻想一下自己就係嗰個影。」

「至於今次換上男聲主唱，其實喺創作初期，腦海裏已經一直有一把好溫柔平和嘅男聲浮現。帶住少少距離感。我覺得呢把聲，啱啱好可以唱出「請熄掉手機」背後嘅提醒——係溫柔嘅，唔係鬧人，而係輕輕咁講：「你準備好入戲未？」 有一種娓娓道來的善良在裏頭。」

音樂總監DAY 亦說出今次禮儀片音樂上的處理：「音樂和編曲也back to basic 以簡約為主，只用一支結他，無論在主音演繹和編曲上也是比較內心和溫柔。以溫暖的聲音，歡迎大家進入戲院。」他補充：「今次換上新詞，除了是因應時代的改變外、更希望提醒大家，有時「入戲院睇好戲」不只是為看一套戲那麼簡單，同時也會是一個約會，也可以是一家人的一個節目。」

以熟悉旋律配上改編後更貼近現代戲院禮儀的歌詞，加上兩位星級嘉賓聲演，勢必讓觀眾眼前一亮。值得一提今次負責動畫製作團隊，並非出自大型或著名的動畫工作室，而是交由一間成立僅數年的本地創作室——Late Studio 負責。他們並非主流業界熟悉的名字，而是一班充滿熱血、創意和誠意的年輕人。我們希望透過是次合作，為新晉創作團隊提供更多發揮的機會，同時支持本地創意工業的發展。製作團隊特別選址有30年歷史、屹立油麻地的百老匯電影中心(bc) 作為全新短片的背景，營造現代而溫馨的氛圍，帶出地道電影院文化，讓觀眾倍感親切。全新禮儀短片將於今日起於百老匯院線全線上映。

資料來源: Kingmart