《正義迴廊》累積票房破千萬謝票

撰文: 編輯部 | 發布日期: 2022年11月09日

News

電影《正義迴廊》今日 (11月9日) 上映第13天,累積票房衝破首個1000萬後,導演何爵天感謝廣大觀眾支持:「《正義迴廊》係我首部長片,得到監製翁子光嘅信任,咁多位實力派演員傾力演出,台前幕後一齊努力,真係非常非常感謝各位支持! 作為一套三級電影,可以得到呢個成績,係非常難得,所以非常感謝各界觀眾嘅支持。嚟緊嘅日子會繼續同演員到各區戲院做分享,希望到時會見到大家!」

監製翁子光千字文讚揚票房已超越《踏血尋梅》

早前,首次擔任監製的金像導演翁子光,在社交平台以千字文分享對《正義迴廊》累積千萬票房感受,經已超越翁導得獎作品《踏血尋梅》的總票房:「電影開畫票房廿幾萬,我倒抽一口涼氣,同自己講『三級片係咁㗎啦!』默默地要脅導演『喂大佬你搏命去謝下票,收得幾多得幾多,觀眾支持我哋都要感恩。』到了第2周,電影票房上升,已經四天成為單日票房冠軍,剛過去的周末周日票房都超過了130萬,大佬呢個係荷里活大片的票房數字啊!我們靠口碑打了一場逆轉勝仗,周六晚我看了票房數字,默默坐在我家中的碌架床流下了眼淚,老懷安慰。」對於票房破千萬,翁導表示:「不敢妄想2000萬或者更多,感恩很多喜歡這電影的觀眾,有啲甚至睇咗幾次,實在是很大的恩情!能喚起大家愛看港片的熱情,導演跟我一樣都好開心!當然我也會繼續逼使導演繼續拉著演員一起謝票,在電影院親近一下各位觀眾,其實是我們比觀眾更加幸福。」

一眾主演獲悉喜訊後,亦紛紛回應分享喜悅

楊偉倫:「一千萬當然好振奮!既然過到一千萬,目標要再放遠啲!但無論幾多萬都好,都要多謝每一位入場觀眾!希望之後會更多更多人入場支持!」

麥沛東:「多謝大家嘅肯定,希望大家繼續入戲院支持我哋,希望更多人可以見證到《正義迴廊》台前幕後整個製作團隊嘅努力成果。」

蘇玉華:「感動、感恩、感激!我愛每一位入場支持「正義迴廊」嘅觀眾,係你哋令我相信呢個世界真係有奇蹟嘅!」

周文健:「恭喜翁監製,何導,所有幕後人和演員有份參與正義迴廊這部好電影!謝謝大家肯侵埋我玩!Cheers !」

林海峰:「正義迴響!」

葉蘊儀:「衝過千萬票房當然非常開心,期待更多嘅千萬來臨,香港好電影加油!最後多謝所有入場的朋友及大家的口碑推介。」

楊詩敏 (蝦頭):「好開心! 好似攞咗「最佳整體演出獎」一樣! 票房繼續上!」

資料提供: 高先電影